Доближувањето на регионот до Единствениот пазар на ЕУ и продлабочувањето на регионалната економска интеграција се првите два столба од Планот на Европската комисија за Западен Балкан за 2023 година, претставен од Претседателката на Европската комисија, Н.Е. г-а Урсула фон дер Лејен, на Форумот на ГЛОБСЕК (GLOBSEC) 2023 во Братислава, на 31 мај 2023 година. Трансформациската моќ на европската интеграција е повеќедимензионална тема, која буди огромен интерес во политичките и академските кругови. Клучните теми вклучуваат продлабочување на трговската и финансиската интеграција, институционална интеграција, како и реална конвергенција кон понапредните европски економии. Како да се забрза трговската и финансиската интеграција на регионот со Европа? Кои се главните предизвици во зајакнувањето на фундаментите и доброто владеење? Како корисно да се исползуваат комплементарностите и синергиите на институционалните и структурните реформи?

Економската политика обезбеди стабилно макроекономско окружување како основа за поголема деловна активност. Она што им е потребно на земјите од Западен Балкан сега се серија на детално разработени и меѓусебно поврзани реформи кои создаваат енергична пазарна економија, економија во која се отвораат нови работни места, се промовираат структурни промени и се основаат нови бизниси. Ова ќе обезбеди флексибилност и приспособливост на бизнисите за да успеат на меѓународните пазари и да се приспособат на предизвиците во однос на пристапувањето во ЕУ. Обновувањето на пазарните механизми и забрзувањето на институционалните реформи би создале погодна средина за економски напредок. Меѓународните финансиски институции се исто така длабоко инволвирани во промовирањето на еколошки, општествено одговорни и одржливи развојни проекти за поддршка на конкурентноста и отпорноста на економиите од Западен Балкан. Кои се главните предизвици за креаторите на политиките во создавањето средина погодна за раст и во промовирањето на економскиот просперитет?

Интеракцијата пoмеѓу геополитиката, креирањето политики и финансиите значително влијае на перспективите за европска интеграција. Динамиката на моќта и регионалните иницијативи ги обликуваат политиките и регулативите што ги спроведуваат владите. Во овој контекст, дипломатијата е од суштинско значење за одржување на единството и промовирање заеднички цели и вредности, преку решавање на политичките, економските и правните прашања со цел обезбедување непречена интеграција на новите земји-членки на ЕУ, олеснување на координацијата на политиките помеѓу земјите-членки и земјите кандидати и зачувување на мирот на европскиот континент. Кои се главните импликации за тековите на финансиите и макроекономските текови? Како дипломатијата и креирањето политики можат да го максимизираат финансирањето на развојот?

Европската и регионалната интеграција силно влијаат врз одлуките и работењето на деловниот сектор. Идентификувањето и инкорпорирањето на новите деловни можности – преку иновативни идеи, решавање на новите прашања, надминување на поделбите и зајакнување на регионалната соработка – е од витално значење за продлабочувањето на интеграцијата во ЕУ. Кои се главните придобивки и предизвици за бизнис секторот? Кои глобални трендови силно (ќе) влијаат на фирмите? Кои се неискористените деловни можности на патот на пристапувањето во ЕУ?